Polo xeito de se introduciren os cálculos:
É ben importante á hora de escoller un modelo, de xeito que en facendo cada cálculo cómpre pensar (máis ou menos segundo o tipo) en como o introducir.
En todo cálculo hai funcións e argumentos (para simplificarmos, evitemos agora distinguir tamén entre operacións e mais funcións). As máis das funcións que aparecen nunha calculadora científica precisan un ou dous argumentos. Segundo a orde na que se deben introducir funciones e argumentos, distinguiremos os seguintes tipos:
Notación alxebraica (DAL, de Direct Algebraic Logic), din os de Sharp que son os únicos, seguramente serían os prioneiros, mais agora case todas as empresas teñen destas. Casio usa as siglas VPAM (de Visually Perfect Algebraic Method). Como cando escrebemos a man as expresións matemáticas, habemos pór as funcións de dous argumentos entre eles mesmos, indo algunhas funcións dun argumento diante e as outras tras do argumento.
Notación mixta (NM, por lle chamar dalgún xeito), tradicional en Casio, TI e  Citizen. Nestas calculadoras temos que seguir pondo as funcións de dous argumentos no meio deles, mais todas as funcións dun argumento van tras del. Pode semellar máis sinxelo, mais como escrebemos coa notación anterior e operamos coa seguinte, esta é preciso aprendela á parte.
Notación polaca inversa (RPN, de Reverse Polish Notation), típica das calculadoras HP. Chámase así na honra do matemático polaco Jan Lukasiewicz, o seu inventor. Nestas calculadoras, todas as funcións colócanse detrás dos seus argumentos. Precisan unha tecla decote  para separar ou introducir os argumentos; mais non precisan parénteses. Intróducense e efectúanse os cálculos na orde que os fariamos a man. Disque desta maneira fan falla menos pulsacións, mais eu engadiría tamén que fan falla máis coñe-cementos matemáticos. Pódese achar unha descrición máis detallada, aínda que en inglés, no museo das calculadoras HP. Noutra sitio (web) pódese praticar cunha calculadora desta caste en JavaScript.
En todos os exemplos incluídos no Multimanual, considérase esta clasificación, xa sexa explicando as diferenzas ou dando tres solucións.

Por expresións completas, tradicional das calculadoras DAL: primeiro escrébese na pantalla todo o cálculo tal como o escrebiría un matemático nunha liña e prémese unha tecla, xeralmente , para que se efectúa dunha vez. No caso de erro, non fai falla voltar a introducir todo o cálculo, pódese corrixir aí doadamente. Se a pantalla ten máis dunha liña, vese daquela a expresión calculada e mais o resultado.

Por nível de prioridade, tradicional das calculadoras NM, mais agora tamén hai calculadoras DAL destas: introdúcese o cálculo, que se irá efectuando a medida que se premen as teclas; as funcións dun argumento introducidas detrás, aválianse axiña; cando se introducir unha operación aritmética, aválianse as funcións que teñen menor ou igual prioridade ca ela; cando se pecha unha paréntese, o que houber dentro; cando se premer a tecla igual , todo o que había pendente. Podemos aprezar cando se avalia unha función, fixándonos en como muda a pantalla. Nos exemplos aparecen pontos neses momentos. As calculadoras DAL deste xénero tamén adoitan amosar as funcións en pantalla.

Inmediata, exclusiva das calculadoras RPN: estas calculadoras traballan cunha pila de números, primeiro introdúcense e despois indícase a función, que se efectúa de seguida cos últimos números da pila e estes son substituídos polo resultado. Nestas calculadoras non fica nenguna función pendente de avaliar, mais si resultados parciais (as posicións superiores da pila) que non vemos na pantalla, malia teren a tecla  para os facer aparecer.